臨近年尾年頭，又出現集體自欺欺人現象，大家忙於（扮）為自己定下新一年目標，然後擺上社交平台呃Like，到執行時就虎頭蛇尾，或者根本冇執行過。
定目標容易，實現目標困難，目標可以因為一時衝動而定下，但實現目標就要持之以恆、深耕細作，正如男女間山盟海誓唔難，難在幾十年相處之間嘅包容、體諒同專一。
自從轉型做Trainer 之後，先發現書到用時方恨少，需要學習嘅智識太多太多，所以2019年我想為自己定下一個目標，要係一年內閱讀50本書，不斷豐富自己嘅學問。
點解要定50本做目標呢? 冇咩原因，因為Bill Gates 話佢一年睇50本書，我就試下跟佢咁做。
我將呢個目標寫上嚟，希望大家為我見證，亦為我監督，令呢個目標得以實現。為左報答大家，我每睇完一本書，都會係「爆數鬥室」FB Page 做一個簡短嘅報告，令大家都有所得著。
按此訂閱我的文章
0 評論