係進入正題之前, 先同大家講聲對唔住, 因為我將要講一D 好難聽嘅說話, 不過呢D 好難聽嘅說話, 同飲涼茶一樣, 雖然難入口, 但對大家有益, 至於飲唔飲, 決定權始終係你身上。
你冇估錯, 今日我要講嘅, 又係推翻激勵教學, 事原我係微博見到下面一篇文章:
「当年和马云一起创业的人当中，”聪明”的人都离开了，留下的”傻子”却都成了富豪！创业，就是一帮“疯子”和一群”傻子”在一起做一件未来可能很牛逼的事情！”疯子”带着的是梦想，“傻子”带着的是勤奋与坚持。”聪明”人是不适合创业的，因为“聪明”的人都想走快捷方式，都不想去学习、改变、成长，只想一步登天，快速成功。所以，真正要做成一件事情，必须要有疯子的梦想 + 傻子的坚持。
好勵志係咪? 然後會有好多創業者, 傳銷上線等等, 引用呢篇文同你講: 我就係下一個馬雲, 而你就係未來十八羅漢之一(阿裡巴巴有18 個創辦人, 人稱十八羅漢), 你願唔願意跟隨我去實現夢想?
基本上呢D馬後炮文章成日都見到, 睇下個時興咩人, 有時係李嘉誠, 有時係郭台銘。呢篇文章最大問題係倒果為因, 好簡單, 如果馬雲冇發達, 聰明人離開就係真聰明, 傻子留低就係真傻子, 咁即係只要馬雲成功, 呢班友做乜都係啱, 而如果馬雲失敗, 佢地就做乜都錯, 當有左結果之後, 用結果去分析過程, 其實毫無意義。
好比有D投資專家, 教你用技術分析睇股票, 咩波浪理論, 黃金交叉之類, 你會發覺全部都好準, 因為佢地係用一個已經完成嘅趨勢, 再套用分析模型, 去解釋呢件事點解會發生, 所以投資專家一定正確。而買股票最難嘅, 就係在於你買/賣個一刻, 趨勢係未完成, 咁究竟應唔應該買/賣呢? 呢個先係投資者最想問嘅問題, 可惜投資專家係答唔到你嘅。
馬雲, 以致十八羅漢今日成功左, 你可以用無數咁多理由去分析, 睇相佬可以話因為呢十八條友天生富貴命; 經濟學家可以話因為佢地有眼光, 趕上電子商貿急速發展時期; 政府官員可以話因為佢地愛國, 將青春奉獻俾國家; 激勵大師亦都可以話因為佢地夠堅持, 跟啱人等等, 點講都啱架喎, 因為已經有左結果啦嘛。問題係, 今日有個人叫你跟佢創業, 你去唔去先?
另外, 故事中形容聰明人「都想走捷徑，都不想去學習、改變、成長，只想一步登天，快速成功。」, 請問呢個「聰明人」定義點得黎? 而所謂嘅「傻人」, 就係「帶著的是勤奮與堅持」, 點解要咁樣講呢? 假設有人搵你創業, 或者做傳銷下線, 通常一開始都見唔到咩實質回報, 你身邊嘅人會開始質疑, 叫你唔好咁傻, 快D抽離時, 你嘅夥伴, 上線同你講十八羅漢嘅故事, 你發現原來傻人就係「帶著的是勤奮與堅持」, 自我感覺良好之下, 繼續做一個外人眼中嘅「傻人」, 咁又可以堅持多一陣。講到尾, 都係想你唔好咁現實, 睇遠D。
我唔係阻止大家追求夢想, 相反仲係十分支持, 但大家要知道自己做緊乜, 而唔係聽完一個似是而非, 好似好激勵性嘅故事, 就盲目咁去做。當日馬雲同十七個夥伴一齊創業, 難道佢地真係傻的嗎? 當馬雲講解佢嘅理念時, 你估佢地有冇去判斷呢條友有冇能力去實現? 如果今時今日有人同你講十八羅漢故事, 你要做嘅唔係去幻想自己將來會點成功, 而係判斷下眼前呢個人, 值唔值得係同佢一齊去冒險, 去追夢, 如果你嘅答案係yes, 請豁出去做。
我再重申一次, 我係現實主義者, 我唔係事事計較回報, 但我一定要知自己做緊乜野。
按此訂閱我的文章
———————–
【免費】60分鐘廣告文案課程
30秒快速Facebook 報名
立即點擊這裡👈
【免費】90分鐘銷售技巧課程
30秒快速Facebook 報名
立即點擊這裡👈
0 評論