我係一個現實主義者

我係一個現實主義者

0 評論

【文青女經紀.上】例會唱勵志歌、長輩圖谷正能量:賺錢不是唯一https://goo.gl/zuq9UA睇完呢篇新聞,我好有興趣探討下呢啲激勵文化。作為一個現實主義者,我係非常目標為本,效果導向,解決問題係靠方法唔係靠情緒,想像下你今日俾客戶拒絕,你要做嘅係去聽激勵講座,定係去檢討自己有咩做得唔好,再積極去改善呢?如果你認為你要先被激勵,之後先有行動力去解決問題,即係話你重視宣洩情緒多過解決問題,你就同一個細路要人氹先肯食飯做功課一樣, 簡單講就係幼稚。

而家好流行人生教練,我唔排除有部份真係有料,能夠幫人搵到人生方向,但我睇落好多都係純粹做激勵,好似餵你食止痛藥咁,幫你暫時忘記痛苦,但藥力過後問題依然存在,依然要解決。

但最大問題都唔係咁,而係有啲所謂人生教練,我唔知係刻意定無知,將一啲毫無根據嘅理論拋出黎,如果你冇從現實角度思考過就跟住做,結果就好似一個盲人同你指方向,令你離目標越來越遠。

例如有人話成功人仕習慣早起身,所以如果你想成功,就要習慣早起。首先如果你真係相信左「早起會成功」呢個理論,就好比個啲補習社廣告,講自己有幾多個狀元學生,你就想像自己入去補習就會做狀元一樣咁,兩者其實冇任何必然關係;第二,從黑天鵝效應思考,如果我搵到一個唔係好早起身,但又符合普遍人對成功定義嘅一個人,「早起會成功」理論立即崩潰。(著名填詞人黃偉文剛剛拍左一個銀行廣告,佢話佢一向習慣日夜顛倒,佢算唔算成功,閣下自裁。)

激勵教學之所以受歡迎,係佢地將成功過程過度簡化,令人對成功有不切實際嘅憧憬。「早起會成功」呢個理論未必一定錯,但從現實主義去睇,解決問題同困難,先係邁向成功嘅一條路,而因為早起,所以你可以有更多時間,做更多工作,解決更多困難,簡單講就係你可以比其他人更勤力,所以「早起會成功」背後隱含嘅就係「勤力會成功」,但唔一定係要早起,你好晏起身再通頂工作,都符合勤力嘅定義。但如果你盲目相信人生教練講嘅野,你可能日日早起身,但又百無聊賴咁過一日。

當然,作為推廣策略,今時今日仲講緊「勤力會成功」呢啲老土正能量,大眾唔會受,當成件事re-packaging 過後,又可以玩幾年。君不見自華人首富王健林公開日程後,人人爭相仿效,個個鬥早起身,但如果你冇解決問題嘅方法同能力,早起身又代表乜野?所以當有你面對問題同困難時,請諗清楚你要嘅係解決問題嘅方法,定係解決問題嘅情緒。

我係一個現實主義者

按此訂閱我的文章


發佈留言

發佈留言必須填寫的電子郵件地址不會公開。 必填欄位標示為

{"email":"Email address invalid","url":"Website address invalid","required":"Required field missing"}
× Whatsapp 查詢