[找數快 – 直銷打探報告]

承蒙大家支持，我11月8日晚上去咗一個商機說明會，而家向大家報告番當晚嘅情況，以及一啲個人分析。先此聲明，當日主辦單位冇落閘放狗唔俾走，我亦都冇加入上述嘅計劃。

說明會由主講者到觀眾，都係中老年人為主，目測50歲以上嘅應該佔超過八成，男女就一半半，觀眾人數約20人。

一開始主講者就介紹呢個創富社交平台（下簡稱平台）嘅背景，講咗好多大家耳熟能詳，但又唔知係乜嘢嘅名詞，如財務自由、被動收入、社交媒體、共享經濟、互聯網金融、大數據、加密貨幣等等，總之成件事（聽落）勁過港珠澳大橋好多倍咁嘅。

近年不少標榜高科技的投資計劃，投資者決定前必須了解清楚。（大公報圖片）

重點嚟喇，究竟平台點樣令大家發達呢？總共有三種模式，首先講最核心嘅上網睇廣告模式，參加者要向平台購買廣告包，每個價值50蚊美金，最少買一個，最多一千個，即係入場費由約港幣400至400,000 不等，之後就要每日上網睇十分鐘廣告（冇錯你要俾錢去睇廣告），平台每日會俾番少少獎勵你，經過120至150日，廣告包就會過期，而呢段時間每個廣告包嘅回報保證有20%。即係一個廣告包四個幾月賺10蚊美金，10個廣告包就賺100蚊美金，如此類推。

根據平台嘅資料，假如閣下持續擁有1,000個廣告包，每月淨係睇廣告嘅收入，已經有港幣20,000，好過你番part-time，甚至好過有啲人嘅正職收入 。

當然，為左實現唔洗做有錢收嘅偉大夢想，你要介紹朋友，模式同一般直銷事業差唔多，下線可以為你製造收入，下下線又為你製造收入，代代繁衍，最多五代，下線獎勵以8% / 4% / 1% / 1% / 1% 分配。如果李根興同你講一舗可以養三代，你而家可以大番佢轉頭，話佢知睇廣告可以養五代。

根據平台嘅資料，假設你介紹咗6個朋友，6個朋友又介紹6個朋友，最樂觀地計算，只要三代，你月入已經近港幣100,000，勁呀哩？

月入近十萬架構圖（平台資料）

第二種模式係朋友樹會藉，會費由10至1,685蚊美金不等，會藉包含一啲點數，有咩用途下面再講，每個人可以介紹三個人入會，朋友樹最多十層，你可以收取十層入面每個會員會費嘅5%做獎金。以1,685蚊美金嘅會藉為例，食足十層有近6,000萬港幣獎金，聽到呢度，好多大叔大媽由衷地發出一聲「嘩～！」。

朋友樹會藉架構圖（平台資料）

第三種模式，平台仲有開發自己嘅加密貨幣，你可以買礦機番去掘，搏未來升值，亦係主講者聲稱「印銀紙」式嘅搵錢方法。

而攞錢嘅方法都有三種，第一種係比特幣、第二種係銀行過戶、第三種係平台會做一個條碼俾你，然後你攞住呢個條碼搵買家變現。

以下有我嘅分析同意見，大家可以先重溫番層壓式推銷嘅特徵：

1. 平台一直形容自己係社交媒體，根據維基百科，社交媒體係「人們用來創作、分享、交流意見、觀點及經驗的虛擬社區和網絡平台」，根據呢個定義，平台做嘅嘢同社交媒體係完全風馬牛不相及，而個啲乜嘢共享經濟、大數據就更加似係信口開河，目的係將平台包裝成高科技投資項目。

2. 主講者聲稱，當平台越多會員睇廣告，就越多廣告商落廣告，平台將部份廣告費分俾會員，再吸引多啲會員加入，形成一個良性循環，唔似我地用Facebook 時會睇到廣告，但廣告費就由 Facebook賺晒，聽落好似幾筍，但睇埋落去你實嘔血。

首先，如果平台係靠會員睇廣告吸引廣告商落廣告，平台應該直接分獎勵俾會員，而唔係要會員先俾錢買廣告包。

第二，主講者即場示範睇廣告流程，啲廣告來自世界各地，有中文、英文、同其他語言，即係話你可能睇咗一啲完全唔知佢講咩嘅廣告，咁樣睇垃圾廣告有咩宣傳效果可言？在於廣告商角度，平台會員亦都係一班垃圾觀眾，因為佢哋睇廣告只係為攞獎勵，廣告商唔會因此成功推銷產品或者推廣品牌。

垃圾廣告及垃圾觀眾，如何帶來宣傳效果？（網絡圖片）

既然廣告冇宣傳效果，廣告商點會肯俾錢？開頭講嘅良性循環亦唔成立，而平台要維持發放獎勵，最大嘅可能性，就係用會員買廣告包嘅錢，即係派番你嘅錢俾你，但留意佢有保證回報4個幾月20%，如果新投入嘅資金唔足以支付嘅話，下一步會發生咩事自己諗。

3. 朋友樹會藉有六級，越高級點數越多，更重要係越高級，直接推薦嘅獎金％越高。

啲點數有咩用架呢？犀利喇，可以用嚟買平台嘅各種服務，包括製作網站（Wix.com 可以免費DIY）、雲端儲存（Google Drive 免費15GB）、打Blog （大量免費平台，不能盡錄）、同發視頻郵件（唔知有咩用），用兩個字講完：垃圾。

以上呢啲點數嘅用途係我自己做research得知，主講者冇提及，原因可能多數人都用唔著，但有一個用途佢講過，就係上網買嘢可以當錢用，最高可以扣減貨品價格嘅25%，聽落都OK 呀，好似超級市場儲積分咁樣。

但當我去到平台嘅網店，我發現原來賣嘅都係平台自家出產嘅禮品，包括水杯、鎖匙扣、記事本等等，全部都有平台Logo，仲要賣得唔平，一本A5 size記事本，賣12.99美金，即約100 港幣 ，仲未計運費，求其一間文具舖都平過佢，簡單講又係兩個字：垃圾。

平台網店出售的商品，定價高昂。（平台網店圖片）

如果點數只能買垃圾，即係話又係靠入會費維持計劃運作，我想講咩你明啦。

4. 最後加密貨幣唔洗講啦，炒幣風險極高，自問受得起先好玩。

5. 平台採用實名制，登記做會員要提供身份證同住址證明等資料，資料保密性存疑。而平台係屬於一間波蘭成立嘅公司，所有嘢都係網上進行。香港分公司係 2017年9月成立，辦事處係旺角朗豪坊嘅一個商務中心單位，即係租個地址嚟註冊，冇官方代表辦事處，有咩事唔知去邊度搵人。

平台的香港分公司註冊地址為朗豪坊一商務中心。（網絡圖片）

總結，我對呢個平台嘅可持續性十分有保留，如果閣下想參與，請小心衡量風險，最後，我要帶個頭盔講：

我冇話過佢呃人！

我冇話過佢呃人！

我冇話過佢呃人！

結尾仲有彩蛋，主講者係臨完結時拎咗張A4 紙出嚟，上面有一首佢自己創作，兼自己手寫嘅打油詩，仲同另一位大叔一唱一和，喜感直迫七十年代嘅＜雙星報喜＞，而且同現場嘅高科技氣氛毫無違和感，為直銷業界豎立起全新標杆，就等我以呢篇打油詩，為打探報告作結。

一次付費，

雙重享受，

三三矩陣，

四處結盟，

五代收益，

六人起動，

七國峰會，

八種收入！

按此訂閱我的文章

———————–

【免費】60分鐘廣告文案課程

30秒快速Facebook 報名

立即點擊這裡👈

【免費】90分鐘銷售技巧課程

30秒快速Facebook 報名

立即點擊這裡👈

相關內容:

妙計追債小故事 賺錢的秘密 高效賺錢模式 收入幾何級上升 銷售︱企業銷售絕密成功關鍵 忽略了注定失敗 如何應付格價精？